唔知大家作文會唔會有一個問題：大家都係寫同一件事，點解人地會高分D，我就咁低分？原因其實好簡單，識得作文既同學會利用不同方式豐富佢地既素材，相反一般既同學只能好基本咁交代情節。今日就教大家3種方式去運用我地既選材！
Step 1: 清晰具體地交代細節
改作文既時候成日都會見到同學以「一場比賽」作為主線，但好多時睇哂成篇之後，除左知佢係籃球比賽之外呢，邊到舉辦又唔知⋯⋯有幾多人參加又唔知⋯⋯舉辦單位係邊個又唔知，結果你同我講你輸左場比賽好唔開心，我都唔知點感受好。所以同學永遠要記住，Marker唔係你，佢都唔係你個FD子，佢對你既認識完完全全係取決於你提供左幾多資料俾佢。
舉個例：你覺得作者輸了那一場比賽更為失落？
A. 樓下社區中心舉辦的羽毛球比賽 B. 全國青少年羽毛球決賽
聰明既你都知係B，記敍6要素（時、地、人、起因、發展，結局）小學生都識，但係要你寫呢，又會一個中6都寫唔出，所以下次唔好下下都比賽比賽，不妨花D心思諗下點寫得具體D。
Step 2 :運用不同手法豐富素材
寫人寫景成日作文都會用，優秀既同學筆下既當然就栩栩如生，人物形象鮮明，相反差既同學呢就鬼影幢幢，D人物冇哂眼耳口鼻啦，唔出聲啦，失驚無神彈出黎啦，極之恐怖既⋯⋯
不論係寫人又好，寫景都好，同學應該都學過唔少既方式表達，下面幾個例子就俾大家參考下啦：
人物：一位嚴而有愛的訓導老師
＊人物描寫 （肖像、行動、語言、心理）＊
鄧老師每天都穿著筆挺的西裝，濃濃的黑眉配上他一雙銳利的眼睛，倍添威嚴，使人不敢直視。
＊人物烘托＊
要是別的老師巡視我們班時，同學依然會視若無睹，唯獨鄧老師有能力令吵鬧聲不絕於耳的課室瞬間變得鴉雀無聲。
場景：義教山區兒童
＊多感官描寫 （視覺、聽覺、味覺、觸覺、嗅覺）＊
一下車，青草與泥土混和的氣味便撲面而來，像提示我今天的義教工作要展開了。（嗅覺）
當地的課室設備與香港相比有著天淵之別，不但環境昏暗，更沒有任何空調設備，焗促的環境使剛到達的我已大汗淋漓。（觸覺）
雖然當地課室的設備簡陋，但他們開懷的笑聲卻一直在課室縈繞著，默默地告訴我他們對學習的熱誠絲毫沒有因此而減退。（聽覺）
今日分享住咁多先，想知多D可以Comment講下你想聽D咩內容：D
Comments